اسكريبات كامل
أختك قالت هتخليه يكره البيت و يكره قعدتك و يكره اليوم اللي بيرجع لك فيه.
أكيد وقتها هتحسي إن في كوم كبير من الكلام هينفجر جواك لو مخرجش هتعملي ايه!
هتفتحي نوت الموبايل و تكتبي فيها كل حاجة بحيث تطلعي طاقة غضبك منهم و تصفي نفسك قبل ما جوزك يجي.
لما يبقى إبراهيم قاعد معاك عنده أهله تتعمدي تخليهم ينطقوا قدامه و تثبتي غلطتهم
البصة دي معناها..
شايف أمك بتقول ايه
أنا مش هرد تقديرا ليك!!
و لما تطلعوا شقتكم بقى تبقى واخده على خاطرك و مضايقة
من نفسه هيحاول يراضيك حتى لو ماعرفش يعاتبهم على إنهم زعلوك بس هيحاول يصالحك عشان هيحس إنك متحملة كتير عشانه
ده اللي لازم تثبتيه قصاده و ده اللي لازم يحس بيه و يكافئك بسببه.
للأمانة مش كلها اتنفذت بسهولة خصوصا إني كنت فاتحة البيوت على بعض بسبب إني بروح كتير عندهم و بفضل أتكلم و ده كان غلط كبير عشان كده كنت بنفذ كل خطوة من التعليمات بصعوبة.
بس مانكرش إن الموضوع جايب نتيجة..
صح يا حورية وصلك الفستان اللي طلبتيه من النت
اللي كنتي عاملة عليه تعليق امبارح الفوشيا المفتوح من الجنب.
لا ماوصلش لغيت الطلب.
ليه ده أنا كنت ناوية لو جبتيه أقيسه عندك و لو حلو عليا أطلب واحد زيه.
مابقتش أثق في حاجات النت خلاص بعد ما طلبته لغيته.
اه.. طيب.
زي ماهي بتكذب أنا كمان كذبت عليها.. رباب أخت إبراهيم ماكنتش هتاخد الفستان تقيسه و لو عجبها هتطلب زيه هي كانت هتقيسه و لو حلو عليها هتاخده مني زي ما عملت قبل كده و أنا انكسفت أقولها لأ!
و عشان كده برضو هبطل أطلب أي منتج في التعليقات قصاد الناس بدل ما هي ماشية ورايا و شايفة كل حاجة بجيبها و بتطمع تاخدها مني.
طلعتي الكيكة
اه أجيب لك تدوق!
قطعي كام حتة كده هنزل بيهم لأمي تحت.
مش بتعجبهم و مش بيحبوا السكر.
هاتي أنت بس و مالكيش دعوة.
ليه و احنا طيب!
هعمل واحده تانية لينا دلوقتي.
قصدت اخليه ينزل بالصنية كاملة عشان يفهم إني كويسة معاهم و مش بستخصر فيهم حاجة.
لما نزل نزلت وراه و قفت على السلم من غير ما يشوفني عشان أسمع هيقولوا ايه
قالوا نفس الكلام!!
فرحانة إنه سمع الكلام اللي يكسف و يكسر الخاطر بنفسه عشان يحس بيا و يعرف كانوا بيقولوا ايه!
ساب لهم الصينية و طلع قبل ما يطلع كنت دخلت بسرعة عشان أحضر مكونات الصينية التانية.
ايه يا إبراهيم مالك
مافيش بتعملي ايه
الصينية التانية.
اعملي على قدك أنت و كرمة أنا مش عايز.
ليه بس دي طعمها حلو بجد.
نفسي اتسدت.
في حاجة حصلت عندهم ضايقتك
قالوا زي مانت قولتي السكر و بتاع بس عادي يعني خدوها برضو و أكيد هتعجبهم.
و لا يهمك.. تعالى أقولك الكيكة بتتعمل إزاي يلا.
فضلت أهزر و أضحك معاه عشان أخليه يغير مزاجه و لما الكيكة طلعت قطعتها و فرشت في البلكونة قعدة عربي كده شكلها جميل و قعدنا ناكل سوا.
أقولك حاجة بصراحة.
خير قول
كتر خيرك أنا النهارده حسيت بيك شكلك شايلة كتير و في نفس الوقت مش بتشتكي خالص.
أصل هشتكي ليه
مافيش حاجة هتتغير بشكوتي غير إني هنكد عليك بالكلام فخلاص أنا بحاول أغير اللي أقدر أغيره و اللي مابقدرش بتحمله.
بتتحمليه لوحدك من غير ماتحكي معايا!
مش مهم أحكي ماتخليش بيتنا تدخله المشاكل بالكلام خلينا كده ننسي مشاكلنا جوه بيتنا مش نهرب من بيتنا من كتر المشاكل اللي جواه.
و الله و كبرتي و عقلتي يا حورية!
عقلت اه كبرتي لا.. أنا لسه قمر يا حبيبي.
يبارك لينا فيك يا عمود البيت.
TiRo
